Fondet për shpronësimin e ndërtesave të banorëve që preken nga projekti për rehabilitimin e segmentit rrugor ‘Pallati me Shigjeta – Rrethrrotullimi Shqiponja” janë gati.
Autoriteti Rrugor njoftoi sot se pronarët e pasurive pronë private, të cilët janë shpronësuar me vendimin e Këshillit të Ministrave të muajit prill të këtij viti të dorëzojnë dokumentacionin për tërheqjen e vlerës për shpronësim.
Banorët duhet të paraqesin fotokopje të noterizuar të certifikatës së pasurisë, kartelën dhe hartën e pasurisë të rifreskuar pranë Agjencisë Shtetërore të Kadastrës, Tiranë, numër llogarie, në emër të pronarit të pasurisë, ose prokurë të posaçme për personat e autorizuar për tërheqjen e vlerës, si dhe një kopje të kartës së identitetit.
Sipas ARRSH-së, dokumentacioni mund të dorëzohet pranë Autoritetit Rrugor Shqiptar, ose nëpërmjet Postës.
