Ambasadorja e Francës në Shqipëri, Christina Vasak, deklaroi sot nga Elbasani se vendimi për të mos hapur negociatat për anëtarësim në Bashkimin Europian nuk i mbyll dyert Shqipërisë.
“Vendimi i Këshillit Europian nuk i mbyll dyert Shqipërisë. Është një vendim solemn, por nuk është mbyllja e dyerve definitive për Shqipërinë sepse është lënë një takim në vazhdim gjatë samitit të Zagrebit. Samiti i Zagrebit është i rëndësishëm sepse Kroacia do të zërë vendin e presidencës në Këshillin e Europës”-, tha Vasak.
Ambasadorja u shpreh se “duhet të kemi diçka të qartë që jo vetëm Kroacia, por të gjitha shtetet e komunitetit europian do të luajnë një rol në këtë vendim. Duhet të kemi një vendim unanim”.
“Ky takim është thelbësor ku do të diskutohet mbi evolucionin e të ardhmes së Shqipërisë dhe vendeve të tjera pretendente. Franca dhe Presidenti francez, Emmanuel Macron, është shprehur qartë mbi mbështetjen që do t’i japë Shqipërisë dhe të gjitha vendeve të tjera pretendente për çeljen e negociatave”.
