Forcat ushtarake të Shqipërisë dhe Kosovës janë bashkuar për të zhvilluar kursin e avancuar të kërkim-shpëtimit në male. Ata po realizojnë trajnimin e tyre në zona mjaft sfiduese malore si: Guri i Plakës, në Bjeshkët e Rugovës-Pejë, në Bjeshkët e Pashtrikut në Gjakovë dhe në malet e Sharrit në Prizren.

Trajnimi po ndiqet nga 6 pjesëtarë të FSK-së dhe 10 pjesëtarë të Forcave të Armatosura të Republikës së Shqipërisë dhe ka për qëllim ngritjen e njohurive të mjaftueshme për përballje me situata të ndryshme në emergjenca të ndryshme natyrore.

“Trajnim i përbashkët i njësive të kërkim-shpëtimit të FSK-së dhe FARSH-së. Në ambientet e Gardës Kombëtare të Forcës së Sigurisë të Kosovës, në Regjimentin e Mbrojtjes Civile në Pomozotin, që nga data 04 tetor e deri më 01 nëntor 2019, është duke u realizuar „Kursi i Avancuar i Kërkim-Shpëtimit në Male“, në të cilin po marrin pjesë pjesëtarë të Forcës së Sigurisë të Kosovës dhe të Forcave të Armatosura të Republikës së Shqipërisë.
Përveç pjesës teorike e cila është duke u realizuar në ambientet e kazermës „Evropianët e Rinj“ në Pomozotin, pjesën teorike, kursantët janë duke e realizuar në terrene të ndryshme malore tepër sfiduese, si te: Guri i Plakës, në Bjeshkët e Rugovës-Pejë, në Bjeshkët e Pashtrikut në Gjakovë dhe në malet e Sharrit në Prizren.
Ky trajnim mjaft sfidues është duke u realizuar nga instruktorët e Qendrës për Trajnime të Kërkim-Shpëtimit të FSK-së, të cilin po e ndjekin 6 pjesëtarë të FSK-së dhe 10-të pjesëtarë të Forcave të Armatosura të Republikës së Shqipërisë.
Qëllimi i këtij trajnimi është ngritja e njohurive të mjaftueshme për përballje me situata të ndryshme, që ndërlidhen me operacione malore dhe po ashtu në aftësimin për menaxhimin e situatave të ndryshme gjatë ballafaqimit me emergjenca të ndryshme natyrore”, thuhet në faqen e Ministrisë së Mbrojtjes së Kosovës.