“Valëviti flamurin shqiptar në Mal të Zi” Arrestohet atleti shkodran, detajet

Një incident ka ndodhur në Mal të Zi. Mësohet se atleti shkodran, Irfan Domnori është arrestuar sërish nga policia malazeze. Arsyeja e arrestimit: valëviti flamurin shqiptar! Ngjarja është bërë e ditur nga Elida Jorgani, person i afërt me atletin 64 vjeçar. Sipas saj, Domnori ka mbajtur flamurin shqiptar në një ekspozitë dhe kjo i ka kushtuar rëndë. Herën e parë ai u arrestua në muajin nëntor dhe u gjobit me 300 euro gjobë dhe një muaj ndalim hyrje në Mal të Zi, pasi valëviti flamurin shqiptar në Krajë. Sipas Jorgonit, këtë herë ai është arrestuar dhe ndodhet në burg prej 7 ditësh. Ambasada Shqiptare në Podgoricë ka zbuluar se ai ndodhet në burg pasi është dënuar me 10 ditë burg. Në Malin e Zi pak ditë më parë u miratua ligji për mbajtjen e simboleve shqiptare por ky ligj nuk ka hyrë ende në fuqi dhe policia malazeze e ka shfrytëzuar duke e arrestuar Domnorin për të dytën herë. Edhe pse ndodhet prej 7 ditësh në burg, institucionet në Shqipëri por edhe politikanët shqiptarë në Malin e Zi nuk kanë bërë reagimet e duhura, për ta nxjerrë nga burgu.