Lidhur me vjedhjen e milionëve në mjetin e biznesmenit Flamur Behi, në pyetje është marrë motra e një prej grabitësve. Ngjarja eshte regjistruar të premten e kaluar, në zonën e Komunës së Parisit, pranë një qendre tregtare. Donald Hoxha, 27 vjeç, dhe Gentian Kane, 44 vjeç, e kanë realizuar vjedhjen nëpërmjet një bllokuesi valësh. Biznesmeni Flamur Behi ka qenë në vezhgim të grabitësve për shumë javë. Pasi e kanë gjurmuar, autorët kanë aktivizuar bllokuesin e valëve, ç’ka bëri që makina të mbetej e hapur pavarësisht se biznesmeni e mbylli me pult.
Pas verifikimeve të kryera për pronësinë e këtij automjeti me të cilin hajduti i çantës është larguar, rezultoi se mjeti ishte në pronësi të Greta Hoxhajt, spikerja e lajmeve në televizionin “Zjarr” në Tiranë. “Shqiptarja.com” mëson se oficerët e policisë kanë telefonuar Greta Hoxhajn duke i kërkuar kësaj të fundit të paraqitet në polici së bashku me mjetin e saj. Por Hoxhaj i është përgjigjur oficerëve të policisë se ndodhej në qytetin e Fierit. Po kështu ajo ka konfirmuar se në datën 22 maj, makinën e saj e ka përdorur vëllai Donaldo Hoxhaj.
Policia ka telefonuar Hoxhajn, por dhe ky person i ka pohuar se ndodhej në Fier, pasi kishte babain sëmurë dhe të shtruar në spital. Jo shumë minuta pas kësaj telefonate, policinë e Tiranës e ka marrë një avokate e cila i ka kërkuar uniformave blu se do paraqitej së bashku me Donald Hoxhajn dhe Gentian Kanen për t’u vetëdorëzuar së bashku me shumën e parave që kishin vjedhur.
