Gjykata e Lezhës ka lënë në burg 21-vjeçarin Erald Pajtani nga Kruja, i cili dyshohet se vendosi një sasi tritoli në një pallat në ndërtim në zonën e Lezhës. Pallati ishte në pronësi të biznesmenit Liman Gjoka, të cilit në harkun kohor të pak javëve i është vendosur dy herë një sasi tritoli.
Rasti për të cilin akuzohet Pajtani është ai i Nëntorit të vitit të kaluar, ku tritoli ishte vendosur në kolonat e pallatit në ndërtim nga Gjoka, ndërsa po në të njëjtin objekt u vendos tritol dhe në muajin dhjetor.
Në seancën gjyqësore të zhvilluar me dyert të mbyllura mësohet se i riu nga Larushku i Krujës nuk ka folur në lidhje me akuzat e ngritura ndaj tij. Ai u vu në pranga në datën 31 Dhjetor, dhe duket se nuk ka pranuar të tregojë se kush është porositësi për vendosjen e tritolit ndaj biznesmenit Gjoka.
