Ndeshja e fundjavës që shkoi mes Paris Saint-Germainit dhe Olympique Marseille, që u mbyll me rezultatin 0-1, u shoqërua edhe me incidente të shumta. Lojtarët e të dyja skuadrave u përfshinë në një përleshje fizike në fundin e ndeshjes.
Me këtë rast, gjyqtari përjashtoi nga fusha pesë lojtarë, mes tyre edhe Neymarin, pasi braziliani e kishte shfrytëzuar rrëmujën për ta goditur prapa koke Alvaro Gonzalezin, me të cilin kishte pasur fërkime gjatë gjithë ndeshjes.
Mirëpo, mbrojtësi spanjoll duket të ketë qenë ‘viktimë’ edhe e Angel Di Marias dhe këtë e kanë treguar pamjet e reja që janë publikuar në mediat sportive. Në një publikim nga “Telefoot”, anësori argjentinas shihet duke e pështyrë Alvaron. Kështu, edhe ai mund të pezullohet për disa ndeshje, në rast se Federata Franceze dhe Ligue 1 nisin hetim për rastin në fjalë.
