Operacioni “Forca e Ligjit” u ka dërguar kërkesat me shkrim për vetëdeklarimin e burimeve të pasurisë 2 shtetasve në Fier, të dënuar për vepra të ndryshme penale.
Sipas njoftimit të Policisë, në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve E. P, banues në Fier, i dënuar për veprën penale “vrasje me paramendim”, mbetur në tentativë dhe I. (L.) N, banues në Fier, i dënuar për veprën penale “Vrasje me paramendim”, mbetur në tentativë.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
