Zjarri në Karaburun nuk po ndalet. Sot në mëngjes duket se situata është njësoj si një ditë më parë dhe pse ushtria ka zhvilluar disa operacione për shuarjen e flakëve. Nga pamjet e siguruara shihet se flakët po avancojnë drejt fshatit Dukat, ndërsa banorët thonë se zjarri po përparon në më pak se 600 metra distancë nga banesat e tyre.
Në rrezik janë banesat aty pranë, pasi flakët po përhapen me shpejtësi, të favorizuara dhe nga moti, se nga shtëpitë e para që rrezikohen banorët janë larguar, ndërkohë që zjarri po i afrohet gjithnjë e më shumë parkut të Llogarasë. Pritet që sot në këtë zonë të ketë një operacion të gjerë si nga toka, por edhe nga ajri.
Ministri i Mbrojtjes, Niko Peleshi, pas mbledhjes së Komitetit të Emergjencave deklaroi se Karaburuni është vatra më e rrezikshme dhe e gjithë vëmendja do të përqendrohet aty.
