Ish-ministri Fatmir Xhafaj ka dalë sot për herë të parë në publik pas largimit të tij nga ministria e brendshme në një aktivitet të Bashkisë së Tiranës, ku nuk i kurseu lavdet për Erion Veliaj, duke kërkuar një mandat të dytë për kryebashkiakun.
Xhafaj tha se ka njerëz që vijnë në pushtet dhe janë të lumtur me karriget e tyre dhe ka të tjerë se e shohin politikën si mision, siç është rasti i Erion Veliajt. Xhafaj nuk i ka fshehur as emocionet në këtë dalje të tij, teksa hera-herës shihej duke fërkuar duart.
“Ka njerëz që ulen në një karrige dhe janë të kënaqur se kanë kapur një karrige; ka njerëz që marrin pushtet dhe janë të lumtur që janë të pushtetshëm; ka njerëz që vijnë për të shërbyer, që kanë një mision që duan të lenë një gjurmë përmes mundësisë që u jep pushteti dhe ky është Erion Veliaj!
Katër vjet më parë na është dashur të flisnim se kush është Erion Veliaj, kurse sot nuk na duhet fare të flasim sepse ai dhe ekipi i tij duhet të tregojnë çfarë punësh kanë bërë dhe janë duke bërë. Puna dhe rezultatet janë treguesi më i mirë, CV-ja më e mirë për cilindo.
Erion Veliaj hyri për një mision dhe me punë, me rezultate, me atë çfarë ka bërë, është duke kërkuar një mandat të dytë, jo për të vazhduar të qendrojë në atë karrige, por për të shërbyer dhe për ta çuar përpara këtë mision. Gjëja më e mirë e tij është puna”, deklaroi Xhafaj.
Kujtojmë se pas dhënies së dorëheqjes ditën e shtunë nga Fatmir Xhafaj ka pasur shumë pikëpyetje për këtë vendim të marrë, pasi ish-ministri nuk kishte dhënë më herët asnjë sinjal largimi. Madje madje pak ditë më parë ai bëri një paralajmërim të fortë, teksa thoshte se koha e të fortëve kishte marrë fund.
