Veç numrit të infektimeve me Covid-19, që çdo ditë rritet në mënyrë të frikshme, Italia po përballet edhe me një “bombë uji”. Kështu e quajnë mediet vendëse atë që po kërcënon banorët e komunës Crotone. Autoritetet kanë dhënë alarmin në mediet sociale për shkak të së ashtuquajturës “bombë e ujit”, që ka sjellë një përkeqësim të menjëhershëm të kushteve atmosferike, me reshje të dendura të pasuara nga vërshime të befta uji.
Vërshimet e befasishme të ujit kanë mbuluar thuajse gjysmën e qytetit. Banorët, të papërgatitur për këtë kapricio të motit duken të trembur edhe për shkak se mendohet që për dy ditët e ardhshme gjendja mund të përkeqësohet. Autoritetet u kanë bërë thirrje banorëve të qëndrojnë në shtëpi “për sigurinë e tyre dhe për të mos penguar operacionet e mjeteve të transportit”.
Në Calabri u dha alarmi i kuq nga Mbrojtja Civile, me qëllimin që të kihet kujdes maksimal pas reshjeve të rrëmbyera të shiut, të cilat kanë bërë dëme të pallogaritshme. Sipas ekspertëve, jemi vetëm në fillimin e këtij përkeqësimi të motit, i cili pritet të zgjasë deri të hënën. Situata për orët e ardhshme mbetet serioze. Crotone është është paralizuar nga shirat, ndërsa cikloni pritet të lëvizë drejt jugut.
