Skandali i mosregjistrimit të një prone me vendim gjykate u ka kushtuar shkarkimin nga detyra 4 juristëve të Kadastrës së Vlorës dhe vërejtje për 19 të tjerë. Por ata rrezikojnë edhe procedime penale, në varësi të përfundimeve të hetimit të gjerë që ka nisur tashmë për tjetërsimin e pronave.
Katër juristë të kadastrës së Vlorës janë shkarkuar nga detyra ndërsa 19 të tjerë kanë marrë vërejte.
Masat janë marrë pas skandalit të injorimit të një vendimi të Gjykatës së Lartë për të regjistruar një pronë.
Burimet thanë se vendimet për 23 punonjësit që janë nën hetim nga Anti krimi ekonomik dhe KLSH u janë komunikuar në Tiranë.
Më herët nga ky institucion u larguan nga detyra drejtori Florian Alimadhi dhe zëvendës drejtorët Klodian Troci dhe Ardjan Musta, tashmë të zëvendësuar.
Por burimet thonë se largimi nga detyra mund të jetë vetëm masa e parë ndaj punonjësve të Kadastrës.
Në varësi të hetimit të Policisë dhe verifikimeve të nisura nga KLSH ata rrezikojnë të çohen për ndjekje penale.
Anti krimi ekonomik zbarkoi në qytetin bregdetar pas denoncimit të skandalit me dosjen 246 që i përket një prone në Jalë.
Ndërsa inspektorët e KLSH sipas burimeve kanë mbërritur pranë Kadastrës së Vlorës që prej Gushtit dhe po verifikojnë të gjitha dosjet e katër viteve të fundit.
Hetimet janë përqendruar tek tjetërsimi i pronës, një prej problematikave më të nxehta kryesisht në bregdetin e Vlorës të denoncuar gjerësisht nga qytetarët.
