Vijon puna për shembjen e 14 objekteve të dëmtuara në Shijak

IKMT vijon punën për shembjen e objekteve të dëmtuara nga tërmeti i 26 nëntorit të shkuar. IKMT ka bërë të ditur për Agjencinë Telegrafike Shqiptare se puna ka nisur që herët në mëngjes dhe në total pritet të prishen 14 objekte, të kualifikuara nga Instituti i Ndërtimit me nivel dëmtimi DS 4 apo DS 5, pra të pabanueshme.  Sipas IKMT, deri më tani në Shijak janë prishur 17 pallate dhe 2 shkolla, ndërsa mbeten për tu shembur 13 pallate dhe 1 shkollë. Në bashkinë e Shijakut paralelisht me shembjen e objekteve të dëmtuara, ka nisur dhe procesi i shpërndarjes së granteve të rikonstruksionit dhe riparimit të banesave individuale. Kreu i Bashkisë së Shijakut, Elton Arbana, bëri të ditur këtë të martën se në javën e parë janë lidhur 637 kontrata dhe kanë tërhequr pagesën në bankë 315 individë. 1 174 familje në banesa individuale dhe 339 familje në 27 banesa kolektive, përfitojnë drejtpërsëdrejti pagesat e granteve për riparimin e dëmeve të shtëpive të tyre.