Vizitë për shkëmbim eksperience në Tiranë, Shqipëri
Një delegacion zyrtar i Qendrës së Rehabilitimit, Stanciq, Dugo Solo i kryesuar nga drejtoresha znj. Sanjica Grbavac, i shoqëruar nga menaxherja e programit znj. Jasna Lesicki dhe punonjësit socialë të qendrës Ivana dhe Petrina, të ftuar zyrtarisht nga kryetari i shoqatës z. Ismailaj, vizitoi Shoqatën e Paraplegjikëve dhe Tetraplegjikëve, Shqipëri.
Vizita filloi me një takim me stafin në zyrë, ku z. Ismajlaj prezantoi stafin dhe punën e shoqatës. Opsionet e bashkëpunimit për projekte të përbashkëta në të ardhmen ishte kryefjala e takimit.
Dita e dytë vijoi me një axhendë të ngjeshur: një takim me disa kryetarë të degëve të rretheve (Vlorë, Durrës, Elbasan dhe Rrëshen). Znj. Sanjica Grbavac prezantoi punën dhe modelet e krijuara në Zagreb për rehabilitimin dhe përfshirjen e personave me aftësi të kufizuara në jetën e komunitetit. Qendrat ditore dhe banesat në apartamente në komunitet, një eksperiencë që duhet marrë si model nga shoqata jonë. Pjesëmarrësit shprehën gjithashtu mirëseardhjen e tyre dhe diskutuan mbi barrierat me të cilat përballen për t’u përfshirë si të barabartë në jetën e komunitetit. U diskutuan mënyrat e bashkëpunimit dhe u shprehën nga të gjithë idetë e projektit për të ardhmen.
Aktiviteti i radhës ishte një vizitë në terren, për të parë ambientin e ofruar nga Bashkia e Tiranës për qendrën e rehabilitimit në Surrel. U identifikuan nevoja konkrete për ta bërë këtë mjedis të aksesueshëm dhe funksional. Ndërhyrjet janë si më poshtë: rikonstruksioni i rrugës 300 m, rikonstruksioni i ambienteve dhe mobilimi me pajisjet përkatëse. Ajo u pasua nga një drekë pune. Të dyja palët shprehën gatishmërinë për të bashkëpunuar sipas opsioneve të paraqitura në thirrjen për projekte nga BE-ja. Nga kryetari i Tetraplegjikëve të Vlorës Hysen Muhameti.
