Moti me temperatura të larta pavarësisht se jemi në muajin tetor, i mban ende të mbushura me pushues plazhet e Vlorës, ku mund të gjesh turistë të huaj por edhe vendas. Ndryshe nga sezoni i verës, qetësia e kësaj periudhe është ajo që i ka tërhequr pushuesit.
“Vij nga Prishtina, jemi së bashku me fëmijët dhe zgjodhëm këtë periudhë pasi është shumë bukur por dhe për shëndetin është shumë mirë. Vlora është shumë e bukur”, tha një pushues. Ndërkohë një tjetër shtoi se; “Na pëlqen të bëjmë plazh në këtë stinë, është shumë bukur këtu, që nga plazhi por dhe infrastruktura.”.
Por kjo periudhë duket se është e duhura jo vetëm për plazh, por edhe për të apasionuarit mbas sportit. Parashutistë nga e gjithë bota kanë ardhur që të fluturojnë mbi plazhin e Ujit të Ftohtë. “Jam nga Gjermania dhe është hera e dytë që vij në Shqipëri. Kam ardhur dje dhe jam duke shijuar, detin, natyrën, ushqimin dhe njerëzit që ka Vlora. E shijoj hedhjen me parashutë në Vlorë dhe ndihem si një zog, pasi peizazhi nga lart është shumë i bukur”, -tha ajo.
