DVP Vlorë/ Arrestohet në flagrancë 1 shtetas dhe procedohen penalisht 5 të tjerë, për vepra të ndryshme penale. Nga specialistët e Hetimit të Krimit në Komisariatin e Policisë Vlorë u bë arrestimi i shtetasit S. S., 26 vjeç, banues në Kurjan, Fier, pasi gjatë kontrollit të ushtruar nga shërbimet e Policisë, në mjetin e tij u gjet dhe sekuestrua në cilësinë provës materiale një dorezë metalike (përforcues grushti).
Specialistët e Hetimit të Krimit në Komisariatin e Policisë Vlorë proceduan penalisht për veprën penale ” Ndërtimi i paligjshëm”, shtetasin F. B., 46 vjeç, banues në lagjen “11 Janari“, Vlorë, pasi u konstatua se kishte ndërtuar në pronën e tij, pa leje nga organet kompetente. Po nga këto shërbime u procedua penalisht për veprën penale “Shkatërrimi pronës”, shtetasi I. P., 50 vjeç, banues në lagjen “11 Janari”, Vlorë, sepse ka thyer një xham në derën e Spitalit Rajonal Vlorë.
Specialistët e Hetimit të Krimit në Komisariatin e Policisë Sarandë proceduan penalisht shtetasit: -M. K., 50 vjeçe, dhe V. B.,58 vjeçe, banuese në Ksamil dhe Sarandë, pasi janë konfliktuar verbalisht dhe fizikisht me njëra-tjetrën. – M. K., 35 vjeçe, banuese në lagjen nr.1, Sarandë, sepse në dyqanin e saj, në lagjen nr.1, bashkia Sarandë, ka ushtruar dhunë psikologjike dhe fizike, ndaj kushërirës së saj, shtetases M. G. Materialet i kaluan Prokurorisë, për veprime të mëtejshme.
