DVP Vlorë/Vijojnë kontrollet në të gjithë qarkun, për parandalimin, evidentimin dhe goditjen e paligjshmërive.
Kapet dhe ndalohet një i dënuar për vjedhje, i dyshuar për kryerjen e një tjetër vjedhjeje ndërsa ishte në kërkim. Arrestohet një shtetas dhe procedohet penalisht një tjetër, për posedim të sendeve të ndaluara.Shërbimet e Komisariatit të Policisë Vlorë dhe Forca e Posaçme Shqiponja bënë të mundur kapjen dhe ndalimin e shtetasit M. H., 45 vjeç, banues në Vlorë. Ky shtetas ishte i dënuar nga Gjykata e Shkallës së Parë të Juridiksionit të Përgjithshëm Vlorë, me vendim të datës 24.07.2024, me 8 muaj e 27 ditë burg, për veprën penale “Vjedhja”.
45-vjeçari dyshohet se ka kryer një tjetër vjedhje më datë 10.01.2025, ku ka marrë nga automjeti i një shtetasi një çantë me një shumë parash dhe sende personale.
Po gjatë këtyre kontrolleve, shërbimet e Policisë arrestuan në flagrancë shtetasin N. K., 20 vjeç, dhe proceduan në gjendje të lirë shtetasin P. L., 18 vjeç, të dy banues në Vlorë. Gjatë kontrollit të ushtruar në automjetin tip “Audi” me të cilin këta shtetas udhëtonin, u gjetën dhe sekuestruan në cilësinë e provës materiale: 2 thika, 1 shkop bejsbolli dhe 1 fenelinë që ngjason me ato të Policisë.
Materialet për të dyja rastet iu referuan Prokurorisë për veprime të mëtejshme.
Policia e Vlorës do të vijojë kontrollet dhe fton qytetarët të bashkëpunojnë në luftën kundër paligjshmërive, duke denoncuar rastet në numrin pa pagesë 112.
