Dy nga tre pengmarrësit e një shtetasi nga kosova do vijojnë të qëndrojnë në qeli.
Gjykata e Vlorës la në burg Orest Çorapajn dhe Julian Zogajn, ndërsa Vilson Agaj do qëndrojë nën masën e arrestit shtëpiak.
Të tre personat e arrestuar pak ditë më parë si pengmarrës në këmbim të lirisë I kërkonin Fisnik Xhakës t’u jepte 70 mijë euro.
Pengmarrësit dhe pengu ishin njohur me njëri tjetrin në një shtet te Bashkimit Europian ku kishin bërë një marrëveshje të paligjshme për trafik droge.
Ata dhunuan 39 vjeçarin nga Kosova dhe e morën peng pasi ky I fundit kishte dalë garant që disa persona në Europë të merrnin një sasi droge me vlerë 70 mijë euro me pretendimin se lekët do i paguanin më vonë.
Vlonjatët dërguan drogën në një vend të BE-së, por personi që e mori nuk u ka kthyer paratë.
Alarmin në polici e dha e motra e pengut. Me banim në suedi, ajo kontaktoi interpolin që njoftoi policinë e Vlorës.
Fisnik Xhaka mbahej peng në një banesë që ishte e monitoruar tërësisht nga kamerat e sigurisë.
