Nga Agron Brataj
Më 17 shtator, Vlora në një pasdite në sallën e hotel New York-ut i bëri një homazh poetit të shquar Fatos Arapi, përmes një videoje poetike, ku u ndërthurën në mënyrë mjaft simpatike poezi të Arapit në gjuhët shqipe dhe suedeze. Fatos Arapi, i cili në 11 Tetor ka përvjetorin e parë të largimit nga jeta do të përkujtohej herë pas here gjatë mbremjes, përmes kujtimeve nga poetët e tjerë të pranishëm në këtë event si Myrteza Mara dhe Sadik Bejko. Ishte një mbrëmje e klasit te lartë, me pjesëmarrës që kishin lidhje të drejtpërdrejtë me letërsinë, artin, si dhe adhurues të poezisë. Recituan poetët vlonjate, recituan dhe hyne ne marredhenie me sallën poetet e ftuara, islandezja Kristin Bjarnadottir dhe suedezja Anna Mattsson.
E zbukuruan mbrëmjen sopranoja e mirënjohur në mjaft skena europiane Alisa Katroshi dhe këngëtarja Ludmilla Baballëku, e cila interpretoi për të pranishmit këngën labe. Pianisti Aulon Naçi do të shoqëronte recitimet e poetëve dhe këngëtarëve me tingujt e pianos së tij. Mbrëmja poetike ishte e konceptuar në formatin e shkëmbimeve letrare mes krijuesve të klubit të shkrimtarëve dhe poetëve “Petro Marko” me poetet e ftuara, suedezen Anna Mattsson dhe islandezen Kristin Bjarnadottir.
Miksimi i poezise me muzikën i dha një dimension shumë të veçantë kësaj mbremje. E kontaktuar nga gazeta jonë inisiatorja dhe moderatorja e këtij aktiviteti, poetja dhe studiuesja Alisa Velaj është shprehur: “Ne duhet të bëjmë secili diçka për Vlorën, me aq sa të mundemi. Klubi i poetëve dhe shkrimtarëve “Petro Marko” nuk është hera e parë që merr inisiativa të tilla. Shpreh mirënjohjen time të thellë për bashkëorganizatorët e tjerë të kësaj mbrëmje poetike; poetët Myrteza Mara, Kozma Billa Rudina Papajani dhe Theodhori Proko. Falenderoj pianistin dhe kompozitorin Aulon Naçi, sopranon Alisa Katroshi dhe këngëtaren Ludmilla Baballëku. Le të mblidhemi dhe bashkëpunojmë me njëri tjetrin si ne 17 Shtator në hotel New York. Për një qytet më të bukur shpirtëror, për një Vlorë sa më europiane”.
