Ylli Rakipi, drejtues i emisionit “Të Paekspozuarit”, ka rrëfyer në emisionin “Repolitix”, në Report Tv se si u njoh me audiopërgimin e Albert Veliut, “Babales” i cili pretendon se ka regjistruar vëllanë e ministrit të Brendshëm, Fatmir Xhafaj për një ngarkesë kanabisi me qëllim trafikimin drejt Italisë. Rakipi thotë se ish-gazetari i emisionit të tij, Jetmir Olldashi, i ka sjellë vetëm një material audio dhe jo video dhe për këtë shkak ai nuk e ka konsideruar si të vlefshëm.
“Nuk është e vërtetë që isha i përfshirë në këtë dosje. E kam marrë vesh kur më thërrastin prokurorët për gazetarin tim që kishte operuar në këtë proces. Gazetari, Jetmir Olldashi, nuk është më me mua. Nuk e kam konsideruar atë material.
Ai shkoi me detyrën që do të kishim videon. Problemet e kësaj natyre janë shumë të vështira. Në emisionin tim, TPZ, kam operuar me video. Kam pritur videon ku vëllai i ministrit do të ishte duke i shitur kanabis gazetarit. Unë nuk e pata atë dhe e konsiderova si një rast që nuk më duhej”, – tha Ylli Rakipi, gazetar.
“Për këtë rast unë dija që do takonte një njeri, Babalen, i cili do të hakmerrej ndaj vëllait të ministrit të Brendshëm. Ky ishte motivi që më paraqiti gazetari. Nuk e kontrollova këtë material pasi nuk e konsiderova fare. A do ta transmetoja po të isha i sigurt për implikimin e vëllait të ministrit të Brendshëm? Patjetër. Edhe sikur i kryeministrit të ishte” – tha Rakipi.
