Kryetari i opozitës, Lulzim Basha do të zhvillojë të hënën një vizitë në Kosovë, ku pritet të takohet me drejtuesit më të lartë të shtetit dhe politikës. Mësohet se vizita e Lulzim Bashës vjen pas ftesës së Kryeministrit të Kosovës, Avdullah Hoti.
Mësohet se në axhendën e kryedemokratit gjatë qëndrimit në Kosovë, ai do të takohet me Kryeministrin Avdullah Hoti, Presidentin Hashim Thaçi, Kryetaren e Kuvendit, Vjosa Osmani si dhe me drejtuesit e partive politike, Vetvendosjes, Lidhjes Demokratike të Kosovës, Partisë Demokratike të Kosovës, Aleancës për Ardhmërinë e Kosovës, Nismës-Socialdemokrate dhe Aleancës Kosova e Re.
Burimë bëjnë të ditur se gjatë takimit me kryeministrin e Kosovës në Tiranë, kryetari i Partisë Demokratike vlerësoi se duhet një bashkëpunim më i ngushtë ekonomik mes Shqipërisë dhe Kosovës.
Bashkërendimi i veprimeve mes dy vendeve është mënyra më e mirë dhe më e suksesshme për të përshpejtuar proceset integruese të të dyja vendeve – theksoi Basha gjatë takimit të zhvilluar në Tirane me kryeministrin Hoti. Duke risjellë në vëmendje bashkërendimin e suksesshëm gjatë procesit të pavarësisë së Kosovës dhe njohjes së saj ndërkombëtare, ndërsa theksoi se “është koha për ti vënë në jetë këto përvoja të suksesshme për të mirën e shqiptarëve”.
Kreu i PD e ka bërë të ditur prej kohësh mbështetjen për autoritetet e Kosovës në proçesin e negociatave Kosovë- Serbi ku ka theksuar se përpos normalizimit të marrëdhënieve, produkti i këtyre negociatave duhet të jetë njohja reciproke mes Republikës së Kosovës dhe Republikës së Serbisë, në respekt të plotë të sovranitetit dhe integritetit territorial të Kosovës.
