Yllka nga Prishtina, 13 vjeçe, është një vajzë që vuan nga një sëmundje e rëndë që quhet Fibroza Cistike, e cila dëmton organet e brendshme. Ajo ka gjetur një mënyrë për të përballuar koston e madhe të terapisë mujore, duke shitur pikturat e saj.
“Terapia mujore shkon deri në 1 mijë euro, por për më shumë nuk e di, se as nëna nuk mi tregon. I falënderoj të gjithë, ia kam arritur të siguroj terapinë vetëm prej pikturave. Mua më pëlqen të bëj edhe piktura të mëdha”, është shprehur ajo. Nëna e vajzës ka deklaruar se kostoja e terapisë është e lartë, madje edhe mbi 1000 euro.
“Kostoja është e lartë e terapisë, ka raste që i shiten pikturat, ka raste që jo. Varet si i e gjejmë edhe terapinë, njëherë 1800. njëherë 1900 dhe 2100 euro”, është shprehur ajo. Vështirësia qëndron në faktin se në Kosovë nuk ka terapi të tillë. Ajo mund të sigurohet vetëm në Gjermani, Itali, Zvicër apo në Amerikë.
Pas shumë kërkesave nga familjarët, më 20 shtator Ministria e Shëndetësisë ka vendosur që ilaçet për Fibrozën Cistike, t’i vendosë në listën e barnave esenciale. Janë me qindra raste të fëmijëve që kërkojnë trajnim nga kjo sëmundje, mes të cilave edhe ai i Yllkës, nxënëses së shkëlqyer në klasën e nëntë në Shkollën fillore “Dardania” në Prishtinë.
