Edhe pse e ka kaluar në një formë të lehtë virusin, duket se një 35-vjeçare kanadeze po vuan pasojat e tij, edhe pse kanë kaluar 257 ditë nga momenti kur ajo u diagnostifikua pozitive me Covid.
Ashley Antonio e kaloi sëmundjen me simptoma të lehta, por tani po vuan nga ato që quhen “pasoja afatgjata”. Sot, ajo ka shpesh dhembje koke të fortë dhe enjtje të kyçeve, ndërsa shton se ka ditë kur nuk mbushet me frymë, ndërsa sqaron se nuk ka pasur sëmundje të tjera që të mund të rëndonin gjendjen e saj.
“Ka ditë që ndihem mirë, ka të tjera që nuk marr dot frymë kur zgjohem. Kam qenë shumë e shëndetshme, nuk kam pasur sëmundje të tjera më parë. Thjesht, virusi erdhi dhe më shkatërroi jetën”, u shpreh Antonio për CBC. Sipas saj, iu deshën 5 muaj pushim nga puna për të marrë veten, por edhe sot e ka të vështirë të ngjisë shkallët pa iu marrë fryma, pavarësisht se bënte stërvitje çdo ditë para sëmundjes.
“Mediat dhe mjekët të japin përshtypjen se nga kjo sëmundje ose shërohesh për 10 ditë, ose vdês. Por, ka një grup të madh njerëzish që janë diku në mes, jeta e të cilëve ndikohet në mënyrë të tmerrshme”, shtoi 35-vjeçarja.
