Pas denoncimit të bërë në polici nga 29-vjeçarja polake për zhdukjen e 74-vjeçarit, Policia e Sarandës është vënë në lëvizje dhe ka bërë të mundur gjetjen e polakut i cili ndodhet në gjendje të mirë shëndetësore.
“Në vijim të informacionit paraprak të dhënë për kërkimet e shtetasit polak Z.K., ju informojmë se si rezultat i bashkëpunimit me shërbimet e Policisë kufitare, gjatë kontrollit në det u bë e mundur gjetja e shtetasit Z.K., i cili ndodhet në gjendje të mirë shëndetësore dhe po shoqërohet për në vendin e tij të akomodimit në Sarandë”, njofton policia.
Ditën e djeshme 29-vjeçarja denoncoi zhdukjen e 74-vjeçarit, i cili ishte futur për tu larë në det por nuk kishte dalë nga uji.
“Më datë 27.06.2021, rreth orës 20:00, në Komisariatin e Policisë Sarandë, është paraqitur shtetasja polake D. R., 29 vjeçe, e cila ka kallëzuar se sot, rreth orës 10:30, shtetasi polak Z. K., 74 vjeç, është futur në det, në Ksamil, Sarandë dhe nuk ka dalë akoma. Shërbimet e Policisë vijojnë kërkimet për gjetjen e shtetasit Z. K.”, njoftoi më herët policia.
