TENSIONE NË VLORË/ Përplasje mes protestuesve dhe Policisë kundër Muzeut Hebraik, qytetarët tentojnë të hyjnë në kantier

Dhjetëra qytetarë janë mbledhur sërish në protestë në Vlorë, kundër ndërtimit të Muzeut Hebraik në lagjen “Muradije”, në zonën historike të qytetit.

Gjatë tubimit janë shënuar momente tensioni dhe përplasje fizike mes protestuesve dhe forcave të Policisë. Qytetarët kanë tentuar të rrëzojnë rrethimin e kantierit dhe të futen brenda tij, por janë penguar nga efektivët.

Situata është tensionuar më tej kur Policia ka tentuar të shoqërojë në komisariat një prej protestuesve. Qytetarët e tjerë kanë ndërhyrë, duke kundërshtuar shoqërimin e tij.

Gjatë protestës, forcat e rendit kanë ndërhyrë për të kontrolluar situatën dhe për të shpërndarë të pranishmit.

Protesta zhvillohet një ditë pasi Gjykata Administrative e Shkallës së Parë Lushnjë pranoi kërkesën për sigurimin e padisë, duke vendosur pezullimin e punimeve për ndërtimin e Muzeut Hebraik pranë ish-Klubit Patriotik “Labëria”, në një zonë ku ndodhet monumenti që kundërshtojnë protestuesit.

Padia është paraqitur nga përfaqësues të nismës për mbrojtjen e monumentit dhe persona që kundërshtojnë ndërhyrjet pranë tij. Ndërkohë, 1034 qytetarë kanë firmosur një peticion kundër punimeve.