Protestat studentore/ 21 të lënduar në Tiranë, mes tyre 8 policë dhe 3 të mitur! Ja gjendja e 21-vjeçarit të plagosur

Detaje të reja janë zbardhur lidhur me personat e lënduar gjatë protestave studentore në Tiranë dhe në qytete të tjera të vendit.

Sipas njoftimit zyrtar, në Spitalin Universitar të Traumës në Tiranë kanë marrë trajtim mjekësor 21 persona, mes tyre 8 efektivë policie, 10 protestues dhe 3 kalimtarë. Mes protestuesve të lënduar janë edhe tre të mitur.

Në qendër të vëmendjes mbetet gjendja shëndetësore e 21-vjeçarit, i cili u plagos gjatë përplasjes me Policinë përpara Ministrisë së Arsimit. I riu vijon të jetë nën monitorimin e ekipit të neurokirurgjisë, por sipas mjekëve, aktualisht nuk ka indikacion për ndërhyrje kirurgjikale dhe nuk rezulton të ketë rrezik për paralizë.

Aktualisht, në Spitalin e Traumës vijojnë të marrin shërbim mjekësor dy persona: protestuesi 21-vjeçar dhe një kalimtar, gjendja e të cilit paraqitet stabël.

Personat e tjerë kanë marrë trajtimin e nevojshëm dhe janë larguar nga spitali me këshillën e mjekut, jashtë rrezikut për jetën.

Ndërkohë, raste të tjera të lënduarish janë regjistruar edhe në spitalet rajonale. Në Vlorë kanë marrë ndihmë mjekësore një efektiv policie dhe dy të mitur, ndërsa në Lezhë është paraqitur për trajtim një e mitur. Të gjithë janë larguar nga spitalet pas marrjes së ndihmës mjekësore.

Protestat studentore janë shoqëruar me tensione dhe përplasje mes protestuesve dhe forcave të rendit, duke shkaktuar të lënduar në disa qytete të vendit.