Trupat e 39 personave janë gjetur të pajetë brenda një kamioni në Angli.
Automjeti, i regjistruar në Bullgari, u gjet në Parkun Industrial Waterglade në Grays, tha policia.
Sipas BBC, 38 prej viktimave ishin të rritur dhe njëri prej tyre i ri. Shoferi i kamionit, një burrë rreth 25-vjeçar nga Irlanda Veriore, është arrestuar me dyshimin për vrasje. Shkak i vdekjes së refugjatëve dyshohet të kenë qenë kushtet e ‘tmerrshme’ në të cilat ata po udhëtonin.
Zëvendës shefi i kontrollit Pippa Mills tha se identifikimi i viktimave ishte “përparësia numër një” për policinë, por që sipas tij, pritet një “proces i gjatë”.
Agjencia Kombëtare e Krimit tha nga ana tjetër që kishte dërguar oficerë për të ndihmuar dhe identifikuar çdo “grup të krimit të organizuar që mund të kenë luajtur një rol” në transportimin e emigrantëve.
Richard Burnett, shefi ekzekutiv i Shoqatës së Transportit Rrugor, tha që kontejneri ishte një njësi frigoriferike, ku temperaturat mund të kenë qenë aq të ulëta sa mund të kenë kapur vlerat -25C. Ai i përshkroi kushtet brenda kontenjerit si “absolutisht të tmerrshëm”.
Një zëdhënës i ministrisë së punëve të jashtme bullgare konfirmoi se kamioni ishte regjistruar në vend.
“Kamioni Scania ishte regjistruar në Varna (në bregun lindor) nën emrin e një kompanie në pronësi të një shtetasi irlandez,” tha ai.
“Policia tha se nuk ka shumë të ngjarë që ata të jenë bullgarë,” shtoi ai.
