Zjarret masive që kanë pushtuar Australinë kanë bërë që situata në vend të jetë shumë shqetësuese. Prej disa javësh zonat më të prekura janë New South Wales dhe Victoria. Zjarret në vend kanë nisur që prej shtatorit të 2019-ës dhe deri më tani kanë humbur jetën të paktën 23-njerëz. Vetëm gjatë kësaj jave zjarret kanë shkrumbuar të paktën 381 shtëpi në New South Wales dhe 43 në Victoria. Sipas autoriteteve deri më tani llogariten 1500 shtëpi të shkatërruara.
Rreth 480 milionë kafshë të llojeve të ndryshme kanë humbur jetën nga zjarret masive, veçanërisht gjallesat e vogla. Ndërsa kafshë si kangurët, apo zogjtë kanë mundur të lëvizin nga një vend në tjetrin për të mbijetuar.
Po ashtu autoritetet, kanë bërë me dije se dita e sotme (4 janar) konsiderohet ditë e rrezikshme. Kjo për shkak të erës së fortë që pritet të fryjë, duke ndryshuar drejtimin dhe ndihmuar në përhapjen e zjarreve.
Në dhjetor, Kryeministri i Australisë Scott Morrison shkurtoi pushimet e tij në Hawaii pasi u kritikua shumë për udhëheqjen e tij gjatë krizës që ndodhet vendi. Ndërsa pak ditë më parë, teksa vizitoi një nga qytetet e prekura nga zjarret, ai u përball me banorë të revoltuar.
