Kryeministri Edi Rama ishte sot në njësinë administrative Xhafzotaj në Shijak ku u dorëzoi çelësat e bllokut tjetër të shtëpive individuale të rindërtuara nga fillimi pasi u dëmtuan nga tërmeti i 26 nëntorit. Nga 567 banesa individuale që po ndërtohen në gjithë bashkinë e Shijakut, në njësinë administrative Xhafzotaj deri tani kanë hyrë në banesa të reja 40 familje, shtëpitë e të cilëve u dëmtuan nga tërmeti.
“Më e keqja është pas krahëve, më e mira është e gjitha përpara për familjet e prekura nga tragjedia e 26 nëntorit të shkuar dhe për vetë Shqipërinë”, tha kryeministri Rama. Kreu i qeverisë i shoqëruar edhe nga ministri i Shtetit për Rindërtimi, Arben Ahmetaj, dhe kryebashkiaku i Shijakut, Elton Arbana vizitoi shtëpitë individuale të rindërtuara në Xhafzotaj, në lagjen Partizan.
Kryebashkiaku i Shijakut, Elton Arbana tha se, “vetëm në këtë lagje kanë mbaruar 25 banesa individuale”. Banorët që përfituan shtëpitë e rindërtuara falënderuan kryeministrin dhe u shprehën se shtëpitë e rindërtuara janë një milionë herë më mirë se ato që kishin.
“Një milionë herë më mirë se ç’ishte, jo një herë”, tha njëri prej banorëve. “Nuk e besonit apo jo s’e do bëhej”, iu drejtua kreu i qeverisë një tjetër qytetari.
“Jo unë e kam besuar”, tha ai. “Po kush s’e ka besuar. S’e ka besuar ajo nona demokrate. Ne çfarë themi e bëjmë, dhe themi çfarë bëjmë”, tha Rama. Kryebashkiaku Arbana tha se, “të gjitha këto familje janë trajtuar me bonus qiraje që nga dita e parë e rënies së tërmetit. Duke dorëzuar çelësat e këtyre shtëpive, ulim ndjeshëm numrin e familjeve që trajtohen me bonus qiraje”.
Arbana shtoi se, brenda datës 25 dhjetor nuk do të ketë më familje në çadër në Shijak.
“Gjithashtu kemi ulur ndjeshëm edhe numrin e familjeve që jetojnë në çadër. Duke pasur një sistem pikëzimi, sot në bashkinë e Shijakut janë vetëm 12 familje që jetojnë në çadër. Dhe brenda datës 25 dhjetor mbarojnë shtëpitë e familjeve që jetojnë në çadër”, tha Arbana.
Kryeministri Rama i dorëzoi çelësat e banesë së re edhe familjes Hamdi Plaku, e përbërë nga 6 anëtarë, e trajtuar me bonus qeraje që nga dita e parë e rënies së tërmetit.
“Kjo familje ka patur një shtëpi 86 m2 dhe sot përfitojnë një banesë individuale 120 m2”, sqaroi Arbana. Ndërsa ministri Ahmetaj tha se, “këtu po shkojmë deri në 31 dhjetor tek 400 shtëpi, dhe 85 që shpresojmë që brenda Vitit të Ri t’i japim pagesën për ta ndërtuar vetë”. Kryeministri Rama falënderoi të gjithë ata që kryen punimet, të cilat u shpreh ai janë perfekte në çdo detaj.
