Gjina Biba është 52-vjeçari i cili u gjet i vdekur ditën e sotme në Elbasan, pasi ishte shpallur i zhdukur nga familja e tij. Biba u gjet pa jetë në zonën e quajtur “Gurrorja”, ndërsa sipas dyshimeve të para, policia tha se ai ka humbur jetën pasi ka rënë nga lartësia. Megjithatë, familjarët e tij tregojnë një version tjetër, teksa ngrenë akuza se 52-vjeçari është masakruar nga punonjësit e gurores.
Viktor Biba ka deklaruar se dyshon që vëllai i tij është masakruar nga punonjësit e gurores dhe më pas ishte hedhur nga lartësia. Ai hodhi poshtë pretendimet se i vëllai ishte i alkoolizuar, duke thënë se nuk e tepronte me pijen. Më tej ai shtoi se do të hidhte në gjyq punonjësit e gurores tek të cilët dyshonte.
“Na kanë thënë tek puna se kishte ardhur në shtëpi por kur shkuam në shtëpi nuk e gjetëm. Është gjetur 200 metra larg vendit të punës, i masakruar. Këtë e kanë bërë vetëm punonjësit që kanë punuar me të të cilët do t’i hedh në gjyq. Këtu është bërë një krim sepse ai është masakruar”-tha ndër të tjera, Viktor Biba.
Viktima banonte në Tiranë, ndërsa punonte në një gurore të Elbasanit, në fshatin Letan ku është gjetur i vdekur ditën e sotme, pas dy ditëve kërkimesh nga të afërmit e tij. Ai është gjetur i pajetë në afërsi të tunelit të Letanit në Elbasan ku punonte në një gurore. Sipas njoftimit të policisë, i ndjeri, dyshohet se ka rënë aksidentalisht nga një lartësi e konsiderueshme dhe për pasojë ka humbur jetën. “Rreth orës 10:30, në fshatin Letan, në vendin e quajtur “Gurorja”, është gjetur i pajetë shtetasi Gj. B., 52 vjeç, banues në Tiranë. Paraprakisht, dyshohet se 52-vjeçari ka rënë aksidentalisht nga lartësia dhe për pasojë, ka humbur jetën”– thuhet në njoftimin e policisë.
