Ministrja e Shëndetësisë dhe Mbrojtjes Sociale, Ogerta Manastirliu ka ndarë shembullin e 57-vjeçares nga Tirana, historinë frymëzuese të Almës e cila ka fituar luftën ndaj kancerit të gjirit. Manastirliu e ka cilësuar historinë e Almës, një shembull frymëzues për të gjitha gratë që përballen me sëmundjen e vështirë.
“Me çfarë force Alma, 57-vjeçarja nga Tirana e ka përballuar luftën me kancerin e gjirit dhe sot është shembull frymëzues për të gjitha gratë që përballen me sëmundjen e vështirë.
E prita me kënaqësi Almën, e cila sot, në ditën kombëtare të depistimit të kancerit të gjirit, nëpërmjet forcës së shembullit vetjak, i drejtohet çdo nënë, çdo vajze, çdo gruaje, të gjejë pak kohë për të bërë kontrollin e gjirit”, tha Manastirliu. Përgjatë muajit tetor në kuadër të Tetorit Rozë në kabinetet e mamografisë, shërbimi do të ofrohet falas me orar të zgjatur nga dita e hënë në të premte, ora 8:00-18:00 dhe të shtunën, nga ora 9:00-14:00. Gjithashtu janë në dispozicion edhe dy mamografitë e lëvizshme, të cilat do të jenë gjatë gjithë muajit në zonat rurale dhe urbane në të gjithë vendin, sipas një kalendari të hartuar nga Instituti i Shëndetit Publik.
