Detaje të reja janë zbardhur nga aksioni në burgun e Durrësit, ku u gjetën 6 celularë të fshehur në një thes boksi në palestrën e institucionit.
Sipas burimeve mediatike, celularët dyshohet se u përkisnin vëllezërve Artur dhe Klevis Hoxhosmani, Adi Çobës, i njohur si “Bizholi”, dhe Renardo Nallbanit. Pajisjet janë sekuestruar dhe dërguar në SPAK për ekspertizë.
Nuk është hera e parë që vëllezërve Hoxhosmani u gjenden celularë në burg. Më 15 maj, njërit prej tyre iu sekuestrua një iPhone.
Artur dhe Klevis Hoxhosmani u arrestuan nga SPAK në korrik 2025, të dyshuar për përfshirje në një rrjet ndërkombëtar të trafikut të kokainës drejt Britanisë dhe vendeve të BE-së. Sipas hetimeve, ata dyshohet se kishin ndërtuar një perandori biznesesh dhe pasurish luksoze me paratë e trafikut të drogës.
