Mbushja e rrugëve të Shqipërisë nga turistët e huaj këtë vit ka thyer rekord në turizëm sa i përket shifrave. Sipas të dhënave më të fundit të Ministrisë së Turizmit, 7.2 milionë vizitorë të huaj kanë hyrë në Shqipëri nga janari deri në gusht.
Në krahasim me një vit më parë vendi ynë ka mikëpritur kështu 27% më shumë të huaj për po të njëjtën periudhë.
Kjo shifër në vetëm 8 muaj i është afruar rekordit prej 7.5 milionë turistësh që u arrit për të gjithë vitin 2022-in , viti më i mirë ndonjëherë në turizëm në bilanc shifrash.
Ndërkohë vetëm në muajin gusht mbi 2 milion vizitorë të huaj kanë ardhur në Shqipëri, ose 18% më shumë krahasuar me të njëjtën periudhë të një viti më parë.
Ministrja e Turizmit Mirela Kumbaro thotë se këto shifra kurorëzojnë punën e të gjithëve atyre që kanë investuar në ngritjen e reputacionit të Shqipërisë turistike.
“Gjuhët e botës që dëgjoheshin çdokund në pikat turistike këtë vit konfirmohen edhe nga shifrat zyrtare, ku Shqipëria mikpriti 2 milionë vizitorë të huaj në Gusht dhe në total gjatë 8 muajve të parë të këtij viti, me rekordin e afro 7.2 milionë vizitorëve”.
Vizitorët nga Kosova mbajnë vendin e parë si ata që e frekuentojnë më së shumti Shqipërinë, ndërsa interes në rritje ka pasur nga spanjollët, italianët, turqit, malazezët, francezët etj.
Ato që ofron Shqipëria u pasqyruan këtë vit si asnjëherë më parë në mediat botërore, duke u kthyer kështu në sytë e turistëve si vendi që duhet vizituar me patjetër.
