Të tjera detaje dalin në dritë në lidhje me arrestimin nga Policia e Tiranës të 20-vjeçarit nga Dobraçi i Shkodrës, i cili me armë në brez lëvizte në zonën e “Komunës së Parisit”. Bëhet fjalë për Samuel Troshanin.
Policia është njoftuar nga një qytetar në mënyrë anonime, sipas të cilit një i ri lëvizte me armë në qytet.
Po ashtu mësohet se pasi ka parë policinë, i riu është futur me shpejtësi në një taksi me qëllim largimin, por efektivët e kanë ndaluar duke i kapur edhe armën që mbante me vete, një pistoletë tip “Beretta” e zbukuruar në lule në pjesën e dorezës.
Njoftimi i policise
Finalizohet operacioni policor i koduar “Komuna”, për goditjen e veprimtarisë kriminale në fushën e armëmbajtjes pa leje.
Operacioni, i zhvilluar nga Komisariati i Policisë Nr. 2, në bashkëpunim me Forcën e Posaçme “Shqiponja”.
Lëvizte me armë zjarri me vete, vihet në pranga 20-vjeçari.
Sekuestrohen një armë zjarri pistoletë, një krehër dhe municion luftarak.
Shërbimet e Komisariatit të Policisë Nr. 2, në bashkëpunim me shërbimet e Forcës së Posaçme “Shqiponja”, në vijim të punës për parandalimin dhe goditjen e veprimtarisë kriminale në fushën e armëmbajtjes pa leje, bazuar dhe në informacionet e marra në rrugë operative, se në Komunën e Parisit, po lëvizte një shtetas i armatosur, kanë organizuar punën dhe kanë finalizuar me sukses operacionin policor të koduar “Komuna”.
Si rezultat i këtij operacioni u bë kapja dhe arrestimi në flagrancë i shtetasit:
– S. T., 20 vjeç, banues në Dobraç, Shkodër, për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Në Komunën e Parisit, shërbimet e Policisë kanë konstatuar shtetasin S. T., i cili sapo ka vënë re shërbimet e Policisë, ka tentuar të futet në një taksi. Pasi është ndaluar, gjatë kontrollit të një çante lëkure që 20-vjeçari kishte me vete, janë gjetur dhe sekuestruar një armë zjarri pistoletë, një krehër dhe municion luftarak.
Materialet i kaluan Prokurorisë, për veprime të mëtejshme procedurale.
