Ambasadori i Gjermanisë në Shqipëri, Petert Zingraf deklaroi se synimi i Berlinit është t’i thotë ‘PO’ çeljes së negociatave me Shqipërinë.
“Kancelarja Merkel ka deklaruar së fundi se Ballkani Perëndimor dhe Shqipëria kanë rëndësi strategjike për Gjermaninë dhe BE-në. Synimi i Gjermanisë është t’i thotë PO çeljes së negociatave me Shqipërinë”, nënvizoi ambasadori Zingraf gjatë takimit me kryetarin e Kuvendit.
Gramoz Ruçi e priti ambasadorin e ri të Gjermanisë, me rastin e fillimit të mandatit të tij në Shqipëri. Ruçi shprehu besimin se gjatë këtij mandati marrëdhëniet midis të dy vendeve do të fuqizohen më tej.
“Gjermania është lokomotiva ekonomike dhe politike e Europës. Ne i jemi mirënjohës Bundestagut, qeverisë gjermane dhe personalisht Kancelares Merkel për fokusin e tyre të veçantë ndaj Shqipërisë dhe Ballkanit Perëndimor dhe mbështetjes së rrugëtimit tonë europian. Shpresojmë që kjo mbështetje do të vazhdojë dhe se Bundestagu dhe Qeveria gjermane do tu thonë PO çeljes së negociatave me Shqipërinë në mbledhjen e Këshillit Europian të tetorit” vuri në dukje Kryetari i Kuivendit Gramoz Ruçi.
Kryetari i Kuvendit Ruçi dhe ambasadori Zingraf biseduan edhe mbi zgjerimin e bashkëpunimit ndërparlamentar dhe nxitjen e investimeve gjermane në industritë prodhuese në Shqipëri.
