Gjykata e Apelit Tiranë ka lënë në fuqi dënimin me burgim të përjetshëm për Robert Përpepajn. Ai akuzohet për vrasjen e 17-vjeçares Griselda Gjikolës, në vitin 2018. Robert Përpepaj, që vazhdon të jetë në arrati kishte kërkuar në Gjykatën e Apelit që të ndryshohet cilësimi i veprës penale nga vrasje në rrethana cilësuese, në vrasje nga pakujdesia. Por kjo kërkesë u rrëzua.
Përmbledhje e ngjarjes: Robert Përpepajn ekzekutoi me dy plumba 17-vjeçaren Griselda Gjikola, mbrëmjen e 28 Dhjetorit të 2018 në zonën e Laprakës. Ndërsa bashkëpunëtori i tij Ronald Muzhaqi është dënuar më 23 vite heqje lirie. Përpepaj u dënua në mungesë dhe është i shpallur në kërkim ndërkombëtar. Ai e përndiqte të renë prej kohësh duke iu kthyer asaj në një shqetësim serioz, sa i mori edhe jetën. Mbrëmjen kur humbi jetën, Griselda së bashku me një shoqe, të fejuarin dhe mikun e tij Erion Benga ishin duke pirë kafe në një nga lokalet e zonës.
Rreth orës 18:00 ata kanë dalë nga bar kafeja dhe kanë hipur në makinë për t’u larguar, por papritur dy persona i prenë rrugën dhe nisën të godasin automjetin. Erion Benga që drejtonte automjetin tentoi të largohej me shpejtësi, por për fat të keq brenda pak sekondash, Përpepaj doli në anën e majtë të makinës dhe qëlloi me dy plumba në kokë 17-vjeçaren Griselda Gjikolën. I plagosur në këtë ngjarje mbeti edhe Bengaj.
