Qytetarë të zakonshëm dhe të apasionuarit pas pushimeve që u larguan nga Britania e Madhe për diellin e ngrohtë të janarit në Greqi, ngelën të zemëruar, pasi kompania RyanAir me një shërbim skandaloz i la të bllokuar në një aeroport të largët në Rumani, prej rreth një ditë larg nga Athina pasi devijoi udhëtimin duke shfrytëzuar uljen në një aeroport me kosto të ulët dhe udhëtarëve u sugjeroi marrjen e një autobusi dhe kryerjen e një udhëtimi tjetër tetë orë për të shkuar në destinacionin për të cilin kishin paguar.
Avioni i RyanAir duhet të ulej në Selanik pasi la aeroportin “Stansted” të Londrës të premten në mbrëmje për atë që duhej të ishte një fluturim tre orësh. Megjithatë, kushtet e këqija të motit në Greqi sipas kompanisë detyruan ekuipazhin që të devijonte fluturimin dhe shkatërroi shpresat e atyre që ishin në bord për të shijuar mesnatën me pije apo vakte të shijshme në qytetin verior të Greqisë.
Në vend që t’i devijonte 200 pasagjerët e fluturimit në Athinë apo aeroportet në Shqipërinë fqinje dhe Maqedoni, avioni fluturoi më në veri, duke kaluar Bullgarinë në qytetin rumun të Timisoara.
Udhëtarët u tërbuan kur linja ajrore u ofroi autobusë për të shkuar në Selanik, një udhëtim mbi 770 km që do t’u merrte 8 orë kohë.
Të paktën 89 pasagjerë refuzuan ofertën, dhe në vend të kësaj iu desh të prisnin në aeroport gjatë natës. Ata më pas hipën në një avion të “Aegean Airlines”, të organizuar nga qeveria greke dhe përfundimisht mbërritën në Selanik pak pas orës 17:00 të shtunën, pothuajse 24 orë të plota pas largimit nga Londra.
Incidenti shkaktoi një valë zemërimi në mediat sociale, ku shumë spekulonin se vendimi i Ryanair për të devijuar deri në Timisoara ishte një masë kursimi nga kompania, pasi linja ajrore low-cost përdor aeroportin si bazë të operacioneve.
Duke kërkuar falje për devijimin që ishte “përtej” kontrollit të tyre, Ryanair tha se klientëve u ofruan një autobus për në destinacionin e tyre ose mund të prisnin që një fluturim alternativ të organizohej pasi u ulën normalisht në Timisoara.
Incidenti vjen më pak se një javë pasi kompania ajrore irlandeze u votua si operatori më i keq i transportit që shërben në aeroportet e Mbretërisë së Bashkuar, duke shënuar vetëm një vlerësim prej 40 përqind nga më shumë se 7,900 njerëz të anketuar, ndërsa ky është viti i gjashtë me radhë që Ryanair merr këtë vlerësim./Gazeta shqip
