Kryetarja e Bashkisë Dimal, Juljana Memaj dhe administrator i shoqërisë “Salillari”, Pëllumb Salillari janë kallëzuar në SPAK nga banorët e fshatit Lumas.
123 banorë dorëzuan kallëzimin e tyre, ku kërkojnë ndjekje penale për veprat “Shpërdorim detyre”, “Shpërdorimi i tokës”, “Prerja e paligjshme e pyjeve”, “Shkatërrimi me zjarr i pyjeve dhe mjedisit pyjor” dhe “Dëmtimi i habitateve në zonat e mbrojtura mjedisore”.
“Jemi vënë në dijeni të disa veprimeve kriminale të kryera nga Pëllumb Salillari. Shoqëria “Salillari” SH.P.K me administrator Pëllumb Salillarin ka shkatërruar dhe prerë kurorën e pishave mbi guroren e Gurit të Bardhë në bashkinë Dimal.
Kjo masakër mjedisore është bërë me qëllim nga kjo shoqëri për zgjerimin e sipërfaqes së shfrytëzimit për gurore dhe furrave të gëlqeres në bashkinë e Dimalit. Janë djegur rreth 30 ha pyje, duke rrafshuar të gjithë kodrën me pisha në lagjen “Guri i Bradhë” në Dimal, vetëm për përfitimet e tij”, thuhet në kallëzimin e tyre.
