Fier/ Arrestohet ish-juristi i Kadastrës, 56-vjeçari ishte shpallur në kërkim nga operacioni “Stolen Land”

Policia ka arrestuar ish-juristin e Agjencisë Shtetërore të Kadastrës në Fier, H. Z., 56 vjeç, i cili ishte shpallur në kërkim në kuadër të operacionit policor “Stolen Land”.

Sipas njoftimit të Policisë, Gjykata e Shkallës së Parë e Juridiksionit të Përgjithshëm Fier, me vendim të datës 17 shtator 2026, kishte caktuar ndaj tij masën e sigurisë “Arrest në burg”, pasi dyshohet për veprën penale të shpërdorimit të detyrës në disa raste.

56-vjeçari, banues në Fier, akuzohet se ka shpërdoruar detyrën gjatë ushtrimit të funksionit si jurist pranë Agjencisë Shtetërore të Kadastrës në këtë qytet.

Ndalimi u krye nga specialistët e Seksionit për Hetimin e Krimeve Ekonomike dhe Financiare, në vijim të operacionit “Stolen Land”, i zhvilluar disa javë më parë.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier për veprime të mëtejshme.

Hetimet për këtë çështje vijojnë, ndërsa ndaj 56-vjeçarit mbetet në fuqi prezumimi i pafajësisë deri në një vendim gjyqësor të formës së prerë.