Barcelona arriti të sigurojë fitore me rezultat 2:0 kundër Getafes, përkundër që i munguan tre lojtarë të rëndësishëm shkaku i lëndimeve – Lionel Messi, Ousmane Dembele dhe Ansumanne Fati – dhe minutat e fundit të ndeshjes i luajti me dhjetë lojtarë në fushë. Orët para fillimit të ndeshjes kundër Getafes nuk kishin sjellë lajme të mira për tifozët e Barcelonës. Trajneri Ernesto Valverde lajmëroi në një konferencë për shtyp se nuk e di për sa gjatë do të mungojë Lionel Messi, më vonë u bë e ditur se Ansumanne Fati ka pësuar lëndim e vetëm pak para fillimit të ndeshjes u bë i ditur edhe lëndimi i Ousmane Dembeles.
Megjithatë, përkundër këtyre mungesave të mëdha, katalonasit arritën ta dominojnë ndeshjen kundër Getafes, duke e mbajtur 62 për qind të posedimit të topit dhe duke qëlluar brenda kuadratit të portës gjashtë herë, në krahasim me vetëm një herë të Getafes. Goditjen e parë vendasve ua dha Luis Suarezi, me golin e tij të shënuar në minutën e 41-të të ndeshjes, i cili u asistua nga portieri Marc-Andre ter Stegen.
Pjesa e dytë ashtu siç kishte përfunduar e para për katalonasit, të cilët arritën ta dyfishojnë epërsinë në minutën e 49-të, përmes Junior Firpes. Barcelona luajti me dhjetë lojtarë në fushë që na minuta e 82-të, kur Clement Lenglet u ndëshkua me kartonin e dytë të ndeshjes, rrjedhimisht të kuq, për shkak të një ndërhyrjeje.
Me këtë fitore, Barcelona ngrihet në pozitën e dytë në tabelën e La Ligës, të paktën për momentin, me 13 pikë të grumbulluara nga shtatë ndeshjet e para (katër fitore, një barazim dhe dy humbje). Valverde do të shpresojë se skuadra e tij do ta arrijë një rezultat pozitiv edhe në mesjavën e ardhshme, kur Barcelona do të përballet me Interin në kuadër të Grupit F të Ligës së Kampionëve.
