Duken si pasojat e një lufte urbane, këto pamje të xhiruara në Barcelonë. Kjo është ajo çfarë ka lënë pas një tjetër natë përleshjesh mes manifestuesve mbështetës të pavarësisë së rajonit të Katalonjës dhe policisë spanjolle.
Manifestuesit, pjesë e një grupimi të madh prej dhjetëra mijëra njerëzish, u vunë flakën gjatë natës automjeteve e objekteve të tjera, si dhe sulmuan dyqanet e ndërtesat përgjatë rrugëve në qendër të Barcelonës. Trazirat kanë hyrë në ditën e tretë pas vendimit të së hënës të gjykatës supreme për dënimin me 100 vite së bashku të 9 liderëve separatisë katalanas.
Protestat e separatistëve kanë nxitur edhe reagimin e grupeve të ekstremit të djathë, që janë kundër pavarësisë së Katalonjës, të cilët po ashtu u përleshën me policinë që krijoi një kordon ndarës mes dy manifestimeve. Trazirat po i shkaktojnë dëme të mëdha ekonomike qytetit.
