Instituti i Mjekësisë Ligjore thotë se viktimat e Covid-19 i nënshtrohen kontrollit të imtësishëm në morg vetëm nëse ka pretendime të forta nga familjarët. Burime i thanë Fax News se në këtë Institucion janë përcaktuar 2 reparte, njëri prej të cilëve i dedikohet viktimave të koronavirusit. Morgu shmang përgjegjësinë mbi vërtetësinë e numrave të viktimave, ndërsa po e njëjta gjë bëhet edhe nga autoritetet spitalore.
Burime pranë Institutit të Mjekësisë Ligjore i thanë Fax News se viktimat që mbërrijnë në morg ndahen në dy reparte njëri prej të cilëve është i dedikuar për personat që humbasin jetën nga Covid-19. Këta të fundit, shoqërohen nga ambulancat që nisen nga spitalet Covid me kartelë të posaçme. I njëjti burim pohon se viktimat mbahen në këtë repart deri në momentin kur tërhiqen nga familjarët, ndërsa reparti tjetër është për qytetarët që humbasin jetën nga sëmundje apo rrethana të tjera. Viktimat e koronavirusit nuk i nënshtrohen një analize mjeko-ligjore përveç rasteve kur ka pretendime të forta nga familjarët.
Instituti i Mjekësisë Ligjore thotë se nuk merret me shifrat ndërsa ia kalon përgjegjësinë spitaleve Covid i cili sipas tij duhet të përgjigjet mbi pretendimet për numrat. Por nga ana tjetër, Fax News kontaktoi edhe me staf mjekësor në njërin nga spitalet Covid në Tiranë, ku pohoi se shifrat e vdekjeve nga koronavirusi janë rritur, por përjashtoi mundësinë që të mos ketë transparencë rreth tyre. Ashtu sikurse morgu, edhe mjekët që merren dhe trajtojnë pacientët e infektuar, shmangin përgjegjësinë rreth numrave të atyre që humbasin jetën.
Debati për mostransparencë mbi numrin e vdekjeve nga Covid-19 e ka përforcuar me një deklaratë të fortë kreu i Partisë Demokratike, Lulzim Basha. Ai publikoi disa dokumente që pretendon se kanë dalë nga Instituti i Mjekësisë Ligjore, të cilat sipas tij tregojnë se numri i viktimave në raport me ato që deklarohen është dyfish.
Sipas numrit një të opozitës, që nga Marsi e deri në muajin Tetor, janë 414 raste vdekjesh nga Covid-19 që janë mbajtur të fshehta. Basha tha se autoritetet për periudhën Mars-Tetor kanë raportuar vetëm 509 raste fatale ndërsa realisht sipas tij, janë 923 viktima nga Covid-19.
