14 punonjësit e nënstacionit elektrik dhe stacionit të pompimit, në Poçem të Mallakastrës, janë futur sot në ditën e tetë të grevës së urisë, ndërsa 10 punonjësit e Uzinës në Ballsh janë futur në ditën e katërt të grevës. Disa prej tyre i ka vizituar sot kryetari i PD-së Lulzim Basha.
Në një postimin në rrjetin social Facebook, Basha shkruan se ata janë tradhtuar dhe keqtrajtuar nga qeveria. “Mbështetje pa kusht për punëtorët dhe kërkesat e tyre! Ata janë tradhtuar dhe keqtrajtuar nga qeveria.Viktimat e Edi Ramës janë njerëzit e thjeshtë, qytetarët e ndershëm shqiptarë që luftojnë për mbijetesë dhe një jetë normale.
Në këtë betejë unë dhe Partia Demokratike do jemi zëri juaj, do jemi mbështetja juaj. Beteja juaj është beteja e çdo shqiptari, ne do të na keni në krah deri në plotësimin e kërkesave tuaja të drejta. Ju jap fjalën se do t’i zhbëj të gjitha padrejtësitë ndaj jush. #PoTëDëgjoj”, shkruan Basha.
