Bashkia Tiranë heq dorë nga projekti i hartuar nga arkitekti danez Bjarke Ingels dhe hap tender me vlerë 60,317,899 lekë nga Buxheti i Shtetit për projektin e Teatrit të ri Kombëtar. Pas prishjes së ndërtesës, Veliaj deklaroi në publik se Fusha ia kishte falur Bashkisë projektin e Ingles.
Bashkia Tiranë ka përcaktuar 7 ditë kohë për dorëzimin e ofertave nga palët e interesuara. Fituesi i tenderit do të shpallet me 14 korrik. Burimi i financimit është nga buxheti i Bashkisë Tiranë. Vendimi i hapjes se tenderit vjen vetëm në momentin kur KLSH kërkoi rindërtimin e teatrit si ishte dhe ku ishte.
Kjo pasi u panë shkelje në ndryshimin e ligjit për zonat e mbrojtura. Po ashtu çështja e teatrit është në Gjykatën Kushtetuese, ndërsa në SPAK janë dorëzuar disa padi. Pas realizimit të projektit, Bashkia Tiranë do marrë 30 milionë euro borxh, me garant qeverinë për ndërtimin e Teatrit të ri Kombëtar.
Teatri Kombëtar u shemb më 17 maj 2020, pas miratimit në fshehtësi të vendimit numër 50, datë 14 maj 2020 të Këshillit Bashkiak. Shembja e Teatrit Kombëtar u dënua nga europarlamentarët, të cilët kërkuan hetim për dhunën dhe arrestimin e protestuesve, gjatë seancës plenare të Komitetit të Jashtëm të PE-së, më 22 qershor.