Gjatë ditës së shtunë, zona e Gjirokastrës është përfshirë nga reshjet intensive të shiut ndërkohë që strukturat e Bashkisë Gjirokastër janë angazhuar në terren, për evitimin e emergjencave për komunitetin.
Sipas kryetarit të Bashkisë Flamur Golemi, në përroin e Çullos, në qytetin e Gjirokastrës dhe atë Sopotit, në Njësinë Administrative Lazarat për shkak të prurjeve të shumta të ujërave gjatë orëve të mëngjesit është punuar intensivisht për të normalizuar gjendjen.
Me mjete të rënda është ndërhyrë për të evituar daljen e tyre nga shtrati dhe përmbytjen e zonave përreth.
“Me uljen e intensitetit të reshjeve do të ndërhyjmë gjithashtu edhe në rrugën e fshatit Zhulat, ndërsa për zhbllokimin e rrugës së Golemit si shkak i rrëshqitjeve të tokës kemi dërguar mjetet tona. Do të bëjmë gjithçka duhet dhe kemi në dorë për të mbajtur nën kontroll këtë situatë. Jemi në terren dhe në gatishmëri të plotë!”, pohon kryebashkiaku Golemi.
Përgjatë ditëve të fundit Bashkia Gjirokastër ka vazhduar ndërhyrjet për rehabilitimin dhe mirëmbajtjen e segmenteve rrugore, pastrimin e kolektoreve të kullimit, sistemimin e shtretërve të përrenjëve me qëllim shmangien e problematikave për komunitetin si shkak i motit të keq të stinës.
