Teatri Kombëtar është mbuluar nga pluhuri i harresës prej më shumë se një jave dhe në sheshin ku ndodhej deri mëngjesin e hershëm të 17 majit nuk gjen dot as inerte të tij. Por Bashkia e Tiranës e fokusuar dukshëm në këtë operacion në terren duket se ka harruar ta fshijë nga lista e atraksioneve të kryeqytetit.
Deri pasditen e sotme, ora 17:20, kjo godinë historike figuronte si një nga arsyet se pse një turist duhet të vizitonte Tiranën.Bashkë me vendodhjen e tij mund të gjeje dhe një përshkrim të historisë së tij që nga ndërtimi i godinës nga italianët në 1941 dhe deri kur kjo ndërtesë u shndërrua në skenë teatri.
Por menjëherë sapo lajmi doli në media që bashkia e Tiranës nuk e ka hequr Teatrin Kombëtar nga atraksionet e kryeqytetit, infomacioni rreth tij u zhduk si me magji. E pra, nga sot Teatri Kombëtar nuk është as në faqen zyrtare të Bashkisë së Tiranës.
