Një ngjarje e rëndë tronditi politikën dhe opinionin publik në Shqipëri dje pasdite, kur, me vendimin e SPAK u arrestua Jamarbër Malltezi, dhëndër i ish-kryeministrit Sali Berisha, ndërsa ky i fundit u la në detyrim paraqitje me akuzën për korrupsion pasiv.
Deri në mesnatë Berisha ishte në selinë e PD-së, nga ku akuzoi Ramën dhe bashkëshorten e tij se fshiheshin pas sulmit dhe në fund refuzoi të takonte dy përfaqësues të Policisë së Shtetit që erdhën në seli për t’i komunikuar ndalimin e lëvizjes jashtë vendit.
Por ndërkohë që ndodhnin këto ngjarje me shumë ndikim në vend, Edi Rama, nuk e prishi terezinë, duke vijuar me postimet e tij “sportive”, si përherë. Dje, pasdite vonë hodhi një foto të staiumit “Air Albania”, ndërsa dy orë më parë publikoi një video nga Parku “Vala” në “Lagjen 18” të Durrësit, duke u mburrur me fushat sportive të disiplinave të ndryshme, palestër të hapur, lojëra për fëmijë, korsi biçikletash, pistë vrapimi, zona pushimi etj. dhe duke u uruar shqiptarëve të dielë të bukur.
