Besa Kokëdhima ishte e ftuar speciale mbrëmjen e sotme në emisionin “Në kurthin e Piter Pan” për të treguar detaje të shumta mbi veten, artin e saj dhe familjen. E veshur me të bardha, Besa këndoi si fillim këngën e famshme të Vaçe Zelës “O moj e bukur Arbëri”.
Nisur nga kënga, Besa tha se ajo nuk është ndjerë kurrë inferiore për origjinën e saj edhe pse ka jetuar në shumë vende të botës. “Nuk jam ndjerë inferiore asnjëherë, ndihem shumë krenare për Shqipërinë edhe pse kam jetuar në Angli, në Francë etj. Ne jemi shumë të fortë, kemi talente shumë”, u shpreh Besa. Ajo shtoi se është ushqyer me atdhedashuri nga familja e saj, sidomos nga babai, Koço Kokëdhima, që e do shumë Shqipërinë dhe nuk e koncepton dot jetën larg vendit të tij. Ajo e përforcoi akoma më shumë mendimin për atdhedashurinë kur u shpreh se burrin nuk do e marrë francez, por ilir.
