Nata e zgjedhjeve në Shtetet e Bashkuara të Amerikës është mbyllur pa fitues, ndërkohë që mediat atje kanë publikuar dhe projeksionet e para. Derimë tani sipas CNN kandidati Joe Biden ka marrë 224 vota elektorale, ndërsa Trump 213, ndërsa vijon numërimi në disa shtete kyçe. Sa i takon shteteve vendimtare, Biden deri më tani ka fituar vetëm Arizonën, ndërsa Presidenti ruajti Floridën, Ohajon, Ajouan dhe Teksasin. Sipas projeksioneve, është në avantazh edhe në Xhorxhia e në të gjitha shtetet ku po numërohen votat, si Miçigan, Uiskonsin dhe Pensilvani.
Shtetet ku ende vijon numërimi dhe votat elektorale që ka secila prej tyre: -Nevada, e cila ka 6 vota elektorale dhe ku Trump shihet në avantazh -Arizona, ka 11 vota elektorale, Biden është në avantazh -Alaska, 3 vota elektorale, Trump është në avantazh të ndjeshëm – Wisconsin, 10 vota elektorale, Biden është në avantazh të lehtë -Georgia, 16, është duke kryesuar Trump me 50.5% -Pennsylvania, 20 vota elektorale, Trump është në avantazh me disa pikë përqindje para Biden -Michigan, 16 vota elektorale, është duke kryesuar Trump me 51.7% -Karolina e Veriut, 15 vota elektorale, Trump është duke kryesuar me 50.1 %
Pasi rezultatet paraprake sugjeruan se Donald Trump kishte siguruar shtetin e rëndësishëm të Floridës e gjithashtu Ohajon e Teksasin, Presidenti amerikan doli përpara 250 të ftuarve në Shtëpinë e Bardhë për të shpallur fitoren. “Kemi fituar kudo, jemi përballë rezultateve fenomenale”, ishin fjalët e Trump. Ai drejtoi gishtin kundër shteteve ku vijon numërimi si Pensilvania, Uiskonsin e Miçigan, e ku, sipas tij, demokratët po përpiqen të vjedhin zgjedhjet.
Presidenti tha se do t’i drejtohej Gjykatës së Lartë për të ndërprerë numërimin atje. Me tone të tjera u shfaq demokrati Joe Biden, i cili, ndërsa shprehu optimizmin për fitoren, tha se duhet treguar durim deri në numërimin e të gjitha votave. Garë edhe më e ngushtë është duke u zhvilluar për Senatin, ku tani për tani secila parti ka siguruar nga 46 karrige, ndërsa në Dhomën e Përfaqësuesve, që është dhoma e ulët e Kongresit, Demokratët kanë epërsi të lehtë me 172 vende, ndërsa Republikanët kanë 165 të tilla.
