Një 50-vjeçar ka rënë nga një lartësi, gjatë orarit të punës. Policia e Tiranës ka bërë me dije se ngjarja ka ndodhur rreth orës 9, në rrugën “Faik Konica”, Tiranë. Shtetasi Ramazan Dika po punonte në një pallat në momentin e ngjarjes, ndërsa informacionet e para kanë treguar se gjendja e tij shëndetësore është e rëndë.
Punëtori është nxjerrë nga gropa me anë të vinçit, për të transportuar më pas në spital. “Tiranë/Informacion paraprak. Më datë 11.09.2021, rreth orës 09:10, në rrugën “Faik Konica”, në një pallat në ndërtim ka rënë nga lartësia punëtori shtetasi R. D., 50 vjeç, i cili po dërgohet në spital, për ndihmë mjekësore. Vijon puna nga grupi hetimor për sqarimin e rrethanave të ngjarjes”, njofton policia.
